![](https://eacnews.asia/uploads/images/14956.jpg)
នាយករដ្ឋមន្ត្រីឡាវជួបជាមួយមេបញ្ជាការទ័ពជើងគោកកម្ពុជាបញ្ជាក់អំពីការគាំទ្រចំពោះកិច្ចសហប្រតិបត្តិការរវាងកងទ័ពនៃប្រទេសទាំងពីរ
វៀងច័ន្ទ៖ នាយករដ្ឋមន្ត្រី នៃសាធារណរដ្ឋប្រជាមានិតឡាវ លោក ផនខាំ វីផាវ៉ាន់ បានទទួលជួបជាមួយមេបញ្ជាការទ័ពជើងគោកកម្ពុជា លោកឧត្តមសេនីយ៍ឯក ហ៊ុន ម៉ាណែត បានបញ្ជាក់អំពីការគាំទ្រចំពោះការពង្រឹងកិច្ចសហប្រតិបត្តិការរវាងកងទ័ពនៃប្រទេសទាំងពីរក្នុងការកសាងព្រំដែនមិត្តភាព សន្តិភាព និងវិបុលភាពរួម។
ជំនួបនេះធ្វើឡើងនៅរដ្ឋធានីវៀងច័ន្ទ នៃសាធារណរដ្ឋឡាវ កាលពីរសៀលថ្ងៃអង្គារ៍ ទី៣០ ខែសីហា ដោយលោក ផនខាំ វីផាវ៉ាន់ បានលើកឡើងអំពីទំនាក់ទំនងសាមគ្គីភាពដ៏យូរលង់រវាងប្រទេសទាំងពីរ និងបានបញ្ជាក់អំពីការគាំទ្រចំពោះការពង្រឹងកិច្ចសហប្រតិបត្តិការរវាងកងទ័ពនៃប្រទេសទាំងពីរឱ្យបានកាន់តែជិតស្និទ្ធ និងប្រកបដោយការទុកចិត្តទៅវិញទៅមក ដែលជាការចូលរួមចំណែកយ៉ាងសំខាន់ក្នុងការកសាងព្រំដែនមិត្តភាព សន្តិភាព និងវិបុលភាពរួម ជាពិសេសការបង្កលក្ខណៈដល់តម្រូវការរបស់ប្រជាជននៃប្រទេសទាំងពីរក្នុងការផ្លាស់ប្តូរសេដ្ឋកិច្ច និងសេវាសុខាភិបាល។
លោកក៏បានថ្លែងនូវការអបអរសាទរ និងកោតសរសើរចំពោះសមត្ថភាព និងកិច្ចខិតខំប្រឹងប្រែងរបស់កម្ពុជាក្នុងនាមជាប្រធានអាស៊ានឆ្នាំ២០២២ សម្តេចតេជោ ហ៊ុន សែន ក្នុងការប្រឈមដោះស្រាយបញ្ហាតំបន់ និងសាកលដែលកំពុងកើតមានប្រកបដោយភាពត្រឹមត្រូវ។
ទាក់ទងនឹងវិបត្តិកូវីដ-១៩នេះ ក្នុងនាមរដ្ឋាភិបាល និងប្រជាជនឡាវ លោកបានថ្លែងនូវការអរគុណចំពោះរាជរដ្ឋាភិបាល និងប្រជាជនកម្ពុជា ដែលតែងបានជួយដល់ប្រទេស និងប្រជាជនឡាវ ក្នុងអំឡុងពេលវិបត្តិគ្រោះអាសន្ននានា ជាពិសេសការផ្តល់ជំនួយជាថវិកា និងសម្ភារបរិក្ខារពេទ្យ រួមទាំងវ៉ាក់សាំង ដើម្បីប្រយុទ្ធនឹងជំងឺរាតត្បាត កូវីដ-១៩។
ជាការឆ្លើយតបមេបញ្ជាការទ័ពជើងគោកកម្ពុជាលោកឧត្តមសេនីយ៍ឯក ហ៊ុន ម៉ាណែត បានថ្លែងអំណរគុណនាយករដ្ឋមន្ត្រីឡាវ ចំពោះការគាំទ្រដល់ការជំរុញកិច្ចសហប្រតិបត្តិការរវាងកងទ័ពនៃប្រទេសទាំងពីរដែលជាកត្តាចូលរួមយ៉ាងសំខាន់ក្នុងការពង្រឹងចំណងមិត្តភាព សាមគ្គីភាព និងកិច្ចសហប្រតិបត្តិការល្អរវាងប្រទេស និងប្រជាជនទាំងពីរឱ្យកាន់តែរឹងមាំ និងយូរអង្វែងតទៅអនាគត។
បច្ចុប្បន្នលោក ហ៊ុន ម៉ាណែត បានក្លាយជាមនុស្សម្នាក់ដែលគេចាប់អារម្មណ៍បំផុតក្នុងចំណោមមេដឹកនាំវ័យក្មេងជំនាន់ក្រោយ ដែលស្ទើរគ្រប់ដំណើរទស្សនកិច្ចរបស់ត្រូវបានការសែត និងអ្នកវិភាគមិនដឹងពីបែបបទពិធីការមួយចំនួនបានលើកយកមកវិភាគជាពិសេសការធ្វើដំណើរទស្សនកិច្ចនៅប្រទេសវៀតណាមកាលពីកន្លងទៅដែលបានជួបប្រមុខរដ្ឋ ប្រមុខរដ្ឋាភិបាលប្រទេសនេះផងដែរ។
ទាក់ទងនឹងដំណើរទស្សនកិច្ចរបស់លោក ហ៊ុន ម៉ាណែត នៅឡាវនាពេលនេះ ត្រូវបាននាយករដ្ឋមន្ត្រីកម្ពុជា សម្ដេចតេជោ ហ៊ុនសែន បានចោទសួរអ្នកវិភាគមួយចំនួនទៅលើការទទួលស្វាគមន៍លោក ហ៊ុន ម៉ាណែត ដោយថាមានការទទួលស្វាគមន៍ច្រើនសណ្ឋានដែលជាការផ្ដល់កិត្តិយសដល់លោក ហ៊ុន ម៉ាណែត។
សម្ដេចតេជោបានលើកឡើងក្នុងហ្វេសបុកសម្ដេចថា៖ «ហ៊ុន ម៉ាណែត ទើបបញ្ចប់ទស្សនកិច្ចនៅឡាវដែលទទួលត្រួតពលដោយនាយអគ្គសេនាធិការកងទ័ពឡាវ។ ក្រៅពីនេះ ហ៊ុន ម៉ាណែត ត្រូវបានទទួលដោយឧបនាយករដ្ឋមន្ត្រីនិងជារដ្ឋមន្ត្រីក្រសួងការពារជាតិ នាយករដ្ឋមន្ត្រីនិងដោយប្រធានាធិបតីឡាវថែមទៀត។ តើអស់លោកអ្នកវិភាគយល់យ៉ាងណាដែរក្នុងទស្សនកិច្ច ហ៊ុន ម៉ាណែត ទៅឡាវលើកនេះ?»
PHOTO: RAKSMEY9